Oier Gomez gasteiztarra Frantziako Meaux presondegitik ospitalera eraman dute, Hodgkin linfomagatik jasotzen dituen kimioterapia tratamenduen azken saioa hartzera. Etxerat-ek jakinarazi du Gomez aurtengo urtarrilaren 18an hasi zela saio horiek jasotzen, eta hamabost egun zeramatzala azken sesioaren zain. Gaur bertan atera dute erietxera, nahiz eta hilabete asko zeramatzan Gomezek ospitalera joan-etorriak eta frogak egiten.
Etxerat-en arabera, orain arte tratamendua zuzen eta oso modu egokian jaso du Gomezek, nahiz eta tratamenduan "gora-beheraren bat" izan duen. "Argi dugu haren osasunak izan duen eboluzio positiboan eragina izan duela laguntza egoki hau jasotzeak. Horregatik, garbi dago gaixotasunak dituzten presoen egoeran laguntza egoki bat jasotzea beharrezkoa dela hala esaten dugun kasuetan; oso beharrezkoa dela laguntza hori bermatu eta modu egoki batean jasotzea. Ezinbestekoa", gaineratu du.
Gose greba bukatu dute Fleuryn
Fleury espetxean (Frantzia) duela hamar egun hasi zuten gose grebari amaiera eman diote bost euskal presok. Bizi-baldintzak "asko gogortu" zizkietelako hasi zuten gose greba, Etxerat-ek adierazi duenez. Espetxeko agintariekin akordioa lortu ostean bukatu dute greba; besteak beste, ziega aldaketen maiztasuna lau hilabetean finkatu dute.
