Espainiako Auzitegi Nazionalak artxibatu egin du Oier Oa preso larresoroarraren aurka zeukan auzia, eta, beraz, Donostiara itzultzen ahalko litzateke. Izan ere, kontraerran juridiko batengatik dago Oa Sartrouvillen bizitzera asignatuta. Alde batetik, Frantzian bizitzeko debekua daukalako, eta bertzetik, euroagindu ezeztatu bat.
Segiko kide izatea egotzita ireki zuen Espainiako Auzitegi Nazionalak Oaren aurkako auzia, 2012an, eta hori da bertan behera utzi dutena. Kasua artxibatuta, beraz, Frantziak kanporatu egiten ahalko luke Oa. Etxebizitza eta familia Larresoron ditu, ordea, Lapurdin. Eta, beraz, Frantziak kanporatuko balu ezinen litzateke bertan bizi.
Frantzian zeukan lau urteko espetxe zigorra beteta apirilean atera zen kartzelatik Oa, eta Saint-Germain-en-Laye hirian bizitzera asignatu zuten hasieran. Sartrouvillera aldatu zuten gero. Larresoroko sostengu komiteak haren bizi baldintzak salatu izan ditu hilabeteotan, erraterako, manifestazioak eta kanpaldi bat eginez.
