Ondarroako (Bizkaia) Udala gobernatzen duen batzordeko lehendakariaren autoari su eman zioten atzo iluntzean. Felix Aranbarri jelkidearena da autoa. Eusko Jaurlaritzako Herrizaingo Sailak jakitera eman duenez, 21:40 inguruan Ondarroako Txorierreka kaleko aparkalekuan auto bat erretzen ari zela ohartarazi zieten. Gerturatzean jakin ahal izan zuten Aranbarrirena zela. Autoa kiskalita geratu zen, eta alboan zituen beste auto batek kalte arinak izan zituen.
Aranbarrik berak albistea jakin ostean atzo gauean Radio Euskadin agertu zuenez, bigarren aldia da autoa erretzen diotela. Ondarroan alkate izandakoa da EAJtik Aranbarri, eta orduan ere erre ziotela esan zuen. Atzokoaren ostean, aurrerantzean segurtasun neurri estuagoak hartuko baditu ere, orain arte moduan lanean segituko duela berretsi zuen.
Maiatzaren 27ko udal hauteskundeetan EAE-ANV izan zen Ondarroan alderdirik bozkatuena, baina Espainiako auzitegiek baliogabetua zuten. Beste alderdien artetik inork ez zuen kargurik hartu -PPkoak salbu- eta Bizkaiko Foru Aldundiak kudeaketa eratu zuen uztailean. Ordutik da bertako lehendakari Aranbarri. EAE-ANVk ez du ordezkaririk batzordean.
Kale erasoa
Ondarroako batzordeko lehendakari Felix Aranbarriren autoa erre dute
Duela zenbait urte ere erre zioten; Ondarroako alkatea zen orduan, EAJren ordezkari.
Iruzkinak
Ez dago iruzkinik
Ordenatu
