Ondarroako (Bizkaia) Saiñazio Mendi Azpixan elkarteko kideek udalekoekin batera eman dute prentsaurrekoa. Pozik hitz egin du Zunbeltz Bedialauneta alkateak: "Herriak denbora luzea darama albiste honen zain, eta azkenean ere iritsi da eguna". Hilabete zailak izan diren arren, harro egoteko moduan direla uste du alkateak, "tamaina honetako arazoei ere irtenbidea ematen jakin dugulako". Eta horretarako elkarlana ezinbestekoa izan dela azpimarratu dute bi aldeek.
Saiñazio Mendi Azpixan elkarteko kideak ere pozik agertu dira etxera itzuli direlako, baina guztia ez dela amaitu ohartarazi dute. Eskerrak eman dizkiete denbora honetan guztian lagundu dietenei, baina gogora ekarri dute "ingurua bere onera etortzeko" asko falta dela oraindik. "Asko sufrituta heldu gara gaurko egoerara". Egiteko daudenak ez alboratzeko eskatu dute.
Pozak poz, oraindik auzia ez dela amaitu ohartarazi du Bedialaunetak ere. Mendia egonkortzeko azken fasea amaitzeke dago, bideak itxita jarraitzen du, eta lur jabeen auzia ere konpontzeko dago. Datorren urtean horiek egiteko moduan izango direla iragarri du.
