Txertaketarekin zerikusia duen mezu faltsu bat sare sozialetan zabaltzen ari dela ohartarazi du gaur Osakidetzak. Mezuak txertaketarako egutegi baten berri ematen du, zehazki, 1962tik 1979ra jaiotakoei noiz dagokien txertatzea zehazten du. Halaber, mezu horretan esaten da ez dela behar Osakidetzaren SMS bat jasotzea txertaketarako ordua hartzeko.
Eusko Jaurlaritzako Osasun Sailak ohar bidez ohartarazi du mezu hori faltsua dela, eta herritarrei eskatu die Osakidetza haiekin harremanetan jarri arte itxaroteko, orain arte egin den bezala. Araban, Bizkaian eta Gipuzkoan txertaketa prozesuak aurreikusitako bidetik jarraitzen duela argitu du Osasun Sailak oharrean, eta, beraz, ez egiteko kasurik sare sozialetan zabaldutako mezuari.
