Zelandi eskola publikoaren eta musika eskolaren gelak erabiliko dituzte topaketetan. Nafarroako Gobernuak Altsasuko Udalari eskatu dio eraikin horiek ez uzteko, topaketak Ernaik eta Aitzinak antolatu dituztelako eta, beraz, helburu politikoak dituzten topaketak direlako. Horrek, Nafarroako Gobernuaren esanetan, urratu egiten du hezkuntza eraikinak uzteko araudia.
Eskaeran, gobernuak aitortu du eskolen eraikinak udalenak direla, baina ohartarazi du Hezkuntza Sistemaren Antolaketa Legeak eta 2/1995 foru dekretuak ezartzen dituela eraikin horiek utzi eta erabiltzeko baldintzak. Araudi horrek dio hezkuntza administrazioari dagokiola ezartzea eskolen erabilera "eskola orduetatik kanpo, hezkuntza, kultura, kirol edo gizarte jardueretarako".
