Espainiako eta Frantziako ordezkariak euskararen aurka hartzen ari diren neurriak salatzeko deitu du protestara Kontseiluak, eta babesak biltzen ari da etenik gabe.
EH Bilduko alkateek agerraldia egin dute Carlos Urkijoren jarrera salatzeko. Espainiako Gobernuak EAEn duen ordezkaria da Urkijo, eta udalen jarduna estu gainbegiratzen ari da. Euskarari dagokionez, adibidez, udalak auzitara eraman ditu kontratazioetan hizkuntz irizpideak txertatzeagatik, aktak euskaraz egiteagatik edo Uema Udalerri Euskaldunen Mankomunitatean sartzeagatik. Euskara planak bidaltzeko eskatzen ere ari da.
EH Bilduko alkateek azaldu dute beste neurri batzuk ere ari dela hartzen Urkijo —Espainiako bandera jarri ez duten udalen aurka, adibidez—, eta egoera "jasanezina" bihurtzen ari dela. "Helburua da gure erakundeen funtzionamendua baldintzatzea eta erabakitzeko ahalmena mugatzea".
Jokabide horri "erantzun komuna" eman behar zaiola nabarmendu dute. Besteak beste, iragarri dute batzorde bat sortu dutela alkateek, eta harremanetan jarriko direla Eusko Legebiltzarreko alderdiekin, zer egin adosteko. Herritarrei ere dei egin diete.
Lehen urrats gisa, gaurko protesta aipatu dute. Kontseiluaren manifestazioa 17:30ean abiatuko da Gipuzkoa Plazan, Oztopoen gainetik euskaraz biziko gara lelopean.
