Bi bizi proiektu paralelo eta aukera estetiko bana dituzte, baina biak ala biak beren garaiko hizkuntza akademikoak gainditzeko beharra sentitu zuten belaunaldikoak dira. Juan Mieg eta Luis Gordillo margolarien lan bildumak batu egin ditu Artium Arabako Arte Garaikideko Museoak aldi berean ikus daitezkeen bi erakusketetan. Miegen erakusketak Xuxurlaka izena du, eta azken garaian egindako formatu handiko 32 margolanek osatzen dute. Gordilloren margolanak XXL/XXI izenburupean bilduta daude: berrogei lan inguru dira guztira, eta erakusketaren izenak erakusten du lanen tamaina handia dela eta duela gutxi egindakoak direla.
Daniel Castillejo Artiumeko zuzendariak azaldu duenez, bi artistek "murruak eraitsi" zituzten margolaritzan eta "asko arriskatu" zuten bestelako bideak topatzeko. Euren lana margolaritzaren "paradisu galduan" garatu dute bi artistek, eta horiek elkartzeko saioa egin du Artiumek.
Xuxurlaka eta XXL/XXI erakusketak abuztuaren 24ra bitartean egongo dira ikusgai.
