Bake bideak prentsari jakinarazi dionez, "presondegietako aktualitateari lotutako agendarengatik" atzeratu du bilera Parisek. Frantziako Justizia Ministerioa eta Ipar Euskal Herriko ordezkaritza asteazken honetan ziren bilera egitekoak, euskal presoen afera lantzeko. Bilera ez dute egun horretan egingo, eta oraingoz ez dute beste egunik jarri.
Frantziak euskal presoak Euskal Herriko espetxeetara gerturatuko dituela jakinarazi osteko lehen bilera izango zen biharkoa. Banakako eskaerei erantzunez egingo ditu gerturatze horiek, preso bakoitzaren dosierra aztertu ostean. Horrek prozedura makala izatea ekarriko duela esan dio Mixel Berhokoirigoinek Euskadi Irratiari.
Covite Terrorismoaren Biktimen Elkarteak gaur bilera bat egingo du Helene Davo Frantziako Justizia Ministerioko kabineteko zuzendariordearekin. Goizean batuko dira, Parisen, ministerioan. Covitek Parisen jarrera aldaketaz dituen "zalantzak" aipatuko dizkio, elkartearen presidente Consuelo Ordoñezek adierazi duenez. "Espainian, preso batek bere etxetik gertu betetzeko zigorra, taldetik eta indarkeriatik aldendu egin behar du, eta eragindako mina aitortu". Ordoñezek azaldu du Parisi galdetuko diotela presoei eskaerak egingo dizkien ala ez.
