Jose Antonio Pastor PSE-EEko bozeramaileak gaur berretsi du bere alderdiak baduela "benetako aukera" legealdia amaitu arte agintean jarraitzeko, eta iritzi dio badagoela "ibilbide nahikoa" horretarako. Pastorrek esan du ez dutela legealdiaren amaiera "sakratu egingo", baina ohartarazi du ez dietela men egingo Antonio Basagoiti EAEko PPko presidentearen nahiei.
Punto Radio irratian emandako elkarrizketa batean, Pastorrek esan du hauteskundeak aurreratzeko eska daitekeela, baina gogorarazi du "eskatzeko bizioaren aurka, ez emateko bertutea" dagoela. Basagoitik hauteskundeak aurreratzeko eskatu berri dio PSE-EEri.
Pastorrek onartu du PSE-EE "gutxiengoan" dagoela, baina azaldu du alderdiak hainbat "akordio zabala" lortu dituela Eusko Legebiltzarrean, eta hainbat alderdirekin "oinarri komun bat" duela esan du, "baita PPrekin ere".
