Fernando Andreu Espainiako Auzitegi Nazionaleko epaileak artxibatu egin du Eduardo Moreno Bergaretxe Pertur ETApm-ko zuzendaritzako kide zenaren desagertzea argitzeko auzia, egin beharreko diligentzia guztiak egin dituztela iritzita.
Perturren sendiak kasua artxibatzeko eskatu zion martxoan, eta Andreuk aintzat hartu du eskaera, gaur ateratako auto baten bidez jakinarazi duenez. Fiskaltza bat zetorren familiaren eskaerarekin.
ETApm-ko kidea 1976ko uztailaren 23an ikusi zuten azkeneko aldiz, Pausun (Lapurdi). Auzitegi Nazionalak 2008ra arte ez zuen ikerketarik abiatu auzia argitzeko. Perturren gurasoek jarritako kereila baten ondorioz hasi zen orduan Andreu auzia ikertzen.
Hiru hipotesi zeuden mahai gainean. Bide politikoen alde zegoelako ETAko Komando Bereziek hil zutela da hipotesietako bat, eskuin muturreko talderen batek hil zuela da bigarrena, eta Espainiako zerbitzu sekretuek aginduta Italiako neofaxistek hil zutela hirugarrena.
