Espainiako Poliziak lagun bat atxilotu du Donostian, bi Bartzelonan eta bost Espainian (Sevillan bi, eta Madrilen, Cadizen eta Badajozen bana), Internet bidez haur pornografia zabaldu dutelakoan. Sarean zeukaten foroa itxi egin du, eta beste hamar pertsona auzipetu egin ditu —inor ez Euskal Herrian—.
Poliziaren arabera, 78 herrialdetan zituzten erabiltzaileak; batik bat, AEBetan, Errusian, Alemanian eta Kanadan. Interneteko orriaren 3.512 pertsona identifikatu ditu.
Ikerketako iturriek adierazi dutenez, web orriaren bidez erabiltzaileei esaten zieten edukia legezkoa zela, "adingabeen argazki artistikoak" argitara zitezkeela, baina orria azken batean haur pornografiaren salmenta gune bat zen. Hiru mila bideo atzeman ditu Poliziak.
