MSR mugimendu faxistaren adar ekologista —Hispania Verde— Erronkarira zihoala-eta, protesta egin zuten hainbat herritarrek maiatzean. Orduko protestaren ondorioz 11 lagun inputatu eta 17.000 euroko isunak jaso dituztela salatu dute gaurko manifestazioan.
Erronkariko arkupeetatik abiatu dira manifestazio zaratatsuan, 17:00etan. "Poliziaren azpijokotzat" jo dute auzia: "Egun horretan parte hartutako edozeinek isun edota inputazioak jaso zitzakeen, eskualde oso batek faxistei ezezko zabal bat adierazi ondoren guardia zibilak zein gobernu delegazioak isun eta inputazio hauek guztiak tramitatu dituelarik, arbitrarioki".
