Carmen Gisasolak 24 urte egin ditu preso.
Zer errealitaterekin topatu zara kartzelatik kanpo? Duela hiru urtetik izandako baimenek erraztu al zizuten egokitzen?
Baimenekin hasi orduko ere banekien gizartean gauzak asko aldatu zirela eta non geunden. Lehengo aldiz atera nintzenean ez nuen izan hainbesteko txokerik. Banuen gizartearen eboluzioaren berri eta banekien barruan geundenok kanpokora egokitu behar genuela, kanpoan ez daudela barrura begira. Barrura sartzen zarenean, azkenean mozketa bat dago, nahiz eta harremanak izaten jarraitu jendearekin edo herriarekin. Duela hiru urte lehenego aldiz atera nintzenean, egundoko poza sentitu nuen, batez ere etxekoengatik, hainbeste urtean nire atzetik ibili direlako. Ikusi genuen atera daitekeela kartzelatik, ez dagoela zertan egon kondena amaitu arte. Legeak ematen dituen aukerak baliatuz, posible da zirrikituak jorratzea.
