Ikaztegietako (Gipuzkoa) jaien egitarau ofizialean jasota dago mobilizazioa. Gaur, 20:30ean dira egitekoak. Horren kontra, ordea, helegitea aurkeztu zuen Espainiako Gobernuak Araba, Bizkai eta Gipuzkoan duen ordezkaritzak, eta, "premiaz", ekitaldia bertan behera uzteko eskatu zuen.
Epaileak asteazkenean eman zuen ebazpena. Han, ez da "manifestazioa edo elkarretaratzea egitearen aurka agertu", ez baita administrazioarekiko auzi prozesu horren "xedea"; horren ordez, ekitaldiaren izaera ofiziala izan du aztergai: "Bertan behera utzi dena da ekitaldiaren udal izaera"; festen egitarau ofizialean jaso izana, alegia, eta ez elkarretaratzea. Epailearen esanetan, presoen inguruko mobilizazioak "izaera ofizialetik banandu behar dira".
Erabakia behin betikoa da, eta ezin zaio helegiterik jarri. Hala ere, hiru eguneko epea eman dio udalari, azalpenak eman ditzan.
Bestalde, udalaren esku hartzerik gabe, Ikaztegietako herritar talde bat prest agertu da elkarretaratzearekin aurrera jarraitzeko.
