Egungo egoerak eskatzen dituen beharrei ahal den ondoen erantzuteko eta euskal presoen eskubideen alde "modurik eraginkorrenean" jarduteko helburuz, Egin Dezagun Bideak jakinarazi du mugimendu berri bat aurkeztuko dutela bihar zortzi. Ideologia eta sentsibilitate politiko askotako pertsonak biltzea da asmoa.
Donostian egingo den ekitaldi batean aurkeztuko dute egitasmoa, Kursaalean, eguerdian.
Egin Dezagun Bidea mugimenduak gaur esan duenez, presoen eskubideen alde gero eta herritar gehiago daude, urtarrilaren 7an Bilboko manifestazioan ikusi zen bezala, eta espetxe auziari aterabidea eman beharra dagoela iritzi dio. "Saihestezina da", adierazi du Ines Osinaga mugimenduko kideak, Donostiako prentsaurrekoan.
"Konponbidearen norabidean" gaurko kartzela politika aldatu egin behar dela exijitzen dute. Hau da, presoak Euskal Herriratzeko, eta zigorraren hiru laurdenak edo bi herenak beteta dituztenak, gaixotasun larriak dituztenak eta zigorra beteta izan arren kondena luzatu dietenak askatzeko.
Egun "jarrera inmobilista bakarra" PPk duela irizten dio Egin Dezagun Bideak.
