Txostenean batez ere bi arlo jorratzen dituzte ikerketa izenpetu duten ehun legelariek: zigorren metaketa eta sakabanaketa. Lehenengoari dagokionez, legelariek nabarmentzen dute Europako auzitegiek zehaztu dutela presoek Europako edozein harrialdetan betetako zigorrak aintzat hartu behar direla geratzen zaien zigor denbora zenbatzerakoan, baina Espainiak 2010eko abuztutik aurrerako zigorrekin baino ez duela betetzen Europak agindutakoa, eta, gainera, uko egiten diola Europako auzitegiei galdetzeari egiten duen interpretazio hori zuzena den ala ez.
Sakabanaketaren inguruan, legelariek uste dute Europako arauen kontrakoa dela. "Inoiz esan da presoek ez dutela zigorrak etxetik hurbileko espetxeetan betetzeko eskubide objektiborik, baina baieztapen hori Europak ebatzitakoaren kontrakoa da guztiz", esan du Jaione Karrera abokatuak.
Sareko eledun Joseba Azkarraga ere mintzatu da txostenaren aurkezpenean. Berriro gogoratu du ETAk jarduera armatua bukatzeko erabakia hartu ostean askok pentsatu zutela "gatazka eta enfrentamendua" atzean utziko lituzkeen garai berria zabalduko zela. "Bost urte geroago ikusten dugu ez dela horrela izan", esan du, eta zenbait epaile eta auzitegiren jarrera gaitzesteaz batera, Espainiako Auzitegi Nazionala desagertzeko eskatu du, "ez baina salbuespen epaitegietarako garaia".
