Jose Antonio Pastor PSE-EEko bozeramaileak "oso zaila" ikusten du Eusko Jaurlaritzaren aurrekontuak babestea. Hala ziurtatu du Ricardo Gatzagaetxebarria Ogasun sailburuarekin bildu ondoren.
Pastorrek ziurtatu du Gatzagaetxebarriak ez diola datu zehatzik eman, eta "etsita" dagoen gobernu baten irudia marraztu du. Emandako datuen artean nabarmendu du garapen ekonomikoari bideratutako kopurua %33 jaitsiko dela, eta beste %10 hezkuntzan, hizkuntza politikan eta kulturan.
PSEko bozeramaileak jakinarazi duenez, ez diete beste bilera batera deitu, eta "harrituta" agertu da horregatik. Martxoaren 12ra arte itxarongo du PSEk, azken dokumentua ikusi arte, eta orduan erabakiko du zer egin.
