Ekonomia gaietan "Rajoyren aurrean eragiteko ahalmena" eskaini dio gaur Arantza Quiroga PPko Euskal Autonomia Erkidegoko presidenteak Iñigo Urkullu Eusko Jaurlaritzako lehendakariari.
Ordu eta erdi iraun du bilerak, eta agerraldi bat egin du ondoren Quirogak. Esan duenez, "sintonia handia" izan dute biek egoera ekonomikoa aztertzean. Gai horretan, Quirogak eskatu dio hitzarmenak ez daitezela izan "unean unekoak" ezta "larrialdi parlamentarioen" araberakoak ere; "haratago" doazen akordioak egiteko, ordea, PPren konpromisoa eskaini dio.
EAEko PPko presidente izendatu berri dute Quiroga, eta ordezkari politiko ia guztiekin biltzeko asmoa du; ez, ordea, EH Bilduko bozeramaile Laura Mintegirekin, iritzita "bidea" egin behar duela "alderdi erabat demokratikoa izateko".
