Aurtengo otsailean izendatu zuten Ricardo Peña Pasaiako Portu Agintaritzako presidente; sei hilabete daramatza karguan, eta aitortu du "konplexutasun" handiko erakundea dela berak zuzendutakoa, "interes eta pertsona asko" baitaude.
"Egungo baldintzetan" Pasaiako kanpoko kaia egiteko egitasmoak aurrera egiteko "aukera gutxi" dituela uste du Peñak, eta datuekin argudiatu du uste hori. Haren esanetan, 2.6-2,7 milioi tonako salerosketarekin amaituko du urtea portuak, eta urteroko batez bestekoa lau milioi tonakoa izango da. "Aurreikusi ditugun neurriak hartuta ere, lau milioi tonara ez gara iritsiko hemendik bost urtera arte".
Salerosketa neurri horretarako, egungo portuaren tamaina "nahikoa" dela uste du, Gipuzkoako enpresen beharrei "ondo" erantzuten dielakoan. Are, ohartarazi du egungo portuak balio ez duela argudiatu izan dela "kanpokoa eraikitzea justifikatzeko".
Egitasmoak izango lukeen eragin ekologikoari ere erreparatu dio Peñak: "Egitasmoaren morfologia eta Jaizkibelgo itsaslabarraren formak kontuan hartuta, asaldura asko eragiten dira barruan". Aurrera jarraitzekotan, proiektuaren morfologia aldatu beharko litzatekeela uste du.
Biharko alean argitaratuko du BERRIAk Peñari eginiko elkarrizketa.
