Rufi Etxeberria ezker abertzaleko kideak esan du EAJk ez duela bete akordio baztertzaileetan ez parte hartzeko ezarri zuen eredua. Atzo PP, PSOE eta CiUrekin testu bat hitzartu dute erakunde armatuari desegiteko eskatzeko, Espainiako Kongresuan.
"Hor Amaiur baztertu zuen, eta hori kezkagarria da. Argibideak eman beharko ditu", esan du Etxeberriak Radio Euskadin emandako elkarrizketa batean.
Alderdi horiek hitzartutakoa ez dela aski azaldu du, irtenbide politiko baterako bide orria planteatzen ez duelako. "Sakoneko arazoa politikoa da, eta hitzarmen horrek ez du sakoneko arazoei irtenbidea emateko konponbiderik planteatzen".
ETA desegitearen inguruan Etxeberriak uste du ETAk jada egin zuela publiko erabaki "historikoa", borroka armatua uzten zuela, alegia. Orain horrek dakartzan ondorioak landu behar dira Etxeberriaren ustez, elkarrizketaren bidez eta nazioartearen esku hartzearekin.
Tartean, presoen gaiari heltzearen garrantzia azpimarratu du. "ETAren militanteak preso dauden bitartean ETA presente egongo da agenda politikoan", gaineratu du.
