Euskal preso eta iheslarien eskubideen aldeko Bagoaz kolektiboak antolatu ditu jardunaldiak. Ipar Euskal Herriko leku anitzetatik etorritako herritarrek parte hartu dute, eta bilkuratik sakabanaketaren aurka lan egiteko "tresna kutxa" bat osatzea dute xedea. Hain zuzen, "herriz herri eta arloz arlo" lantzeko dinamikak sortu nahi dituzte.
Joan den otsailean sortu zuten Bagoaz kolektiboa Zuberoa, Lapurdi eta Baxenabarreko 24 eragilek, eta geroztik hiru arlo landu dituzte batez ere: eri diren presoen egoera, baldintzapeko askatasun eskaerak eta sakabanaketa. Azken gai horren inguruan sakondu nahiko lukete jardunaldiei esker. Frantziako Gobernuari ez ezik, gizarteari ere zuzenduko zaizkie dinamikak.
