Sanferminetan gerta daitezkeen eraso sexistei aurre egiteko, neurriak areagotuko ditu Nafarroako Foruzaingoak. Besteak beste, 750 foruzain inguru ariko dira egunero festa gunean, "segurtasun bermatzen". Iruñeko Udaletxeko plazan, esaterako, kontrolak indartuko dituzte, emakumeen aurkako erasorik egon ez dadin. Javier Morras Nafarroako Presidentetza, Justizia eta Barne kontseilariak azaldu duenez, txupinazoaren unean jarriko dute berebiziko arreta, azken urteotako gertaerak errepika ez daitezen.
Aurtengo berritasun nagusia bada ere, entzierroaren ibilbidean "indarkeria ekintzak" saihesteko esku hartuko dute, halaber. Nafarroako Foruzaingoak gogorarazi du zezenen kontra egiten dutenek isunak jaso ditzaketela. Festetan "errespetuz" jokatzeko deia egin die hurbiltzen diren guztiei.
Foruzaingoaz gain, Espainiako poliziek (900), Guardia zibilek (1.300) eta udaltzainek (400) ere parte hartuko dute jaietako segurtasun protokoloan. Denera, 3.350 polizia ariko dira.
