Sanferminetarako guztia prest dago

Eguardiko hamabietan punttuan lehertuko da jaia eta festa Iruñean. Udaletxeko plazak kolore zuri-gorria hartuko du, eta ez da faltako txanpainik eta zalapartarik. Aurtengo jaiei ongietorria emango dien suziria IUN-NEBeko zinegotziak, Idoia Saralegik botako du. Ondoan izango ditu IUko koordinatzaile Gaspar Llamazares, Iniciativa Per Catalunya-Verdseko koordinatzaile Jordi Guillot eta Bartzelonako udaleko alkateorde Inma Mayol.

Aurtengo Sanferminetan, zezenketa eta entzierroek ez ezik, musika kontzertuek ere protagonismoa hartuko dute. Gaztelu Plazan, besteak beste, Niña Pastori, Miguel Rios edo Jarabe de Palo taldeekin gozatu ahalko da. Fundacion Tony Manero eta Bumburyk Foru Plaza jantziko dute musikarekin. Bederatzi egunez, Iruñeko kaleak bertako eta atzerriko jendez beteta egongo dira, kolorez, musikaz… eta isiltasunarekin hautsiko da.

Mundu guztian ezaguna da, egun hauetan, goizero Iruñeko kaleak zeharkatuko dituenentzierroa. Orain hamar urte, entzierroan zezen batek hil zuen AEBetako Matthew Peter Tassio gaztea omenduko dute. Arriskuak gutxitu asmoz, Iruñeko udalak,txostenak banatuko dizkie entzierroan aterako diren korrikalariei. Segurtasun arauak medio, zezenplazan berrikuntzak egin dira. Armaila bat gehitu dute, ondorioz, plazaren zabalera zertxobait txikiagotu da. Su-artifizialek ere, gauero kolorez jantziko dute Iruñeko zerua. Festak segurtasunez igarotzeko, Nafarroako Gobernuak neurriak hartu ditu. Batzuk festa egiteko, besteek lana egin behar. Foru Poliziak, Gurutze Gorriak, kale garbitzaileek, jatetxeek, tabernek… gogor egin beharko dute lan datozen egunotan.