Sanzen arabera, "euskararen alde jarrera diskriminatorio bat izateko" balio izan du Euskararen Legeak

Nafarroako Euskararen Foru Legea bere horretan uztearen alde agertu da Miguel Sanz Nafarroako presidentea, erkidegoko hizkuntz errealitatearen neurrikoa eta egokia dela iritziz. Areago, lege horren bidez "euskararen aldeko jarrera diskriminatorioak" hartu direla adierazi du Radio Euskadin egin dioten elkarrizketan. "Euskararen Foru Legeak balio izan du islatzeko gure erkidegoko hizkuntz errealitatea zein den. Areago, euskararen alde jarrera diskriminatorio bat izateko balio izan du". Izan ere, adierazleen arabera dagokiona baino babes handiagoa ematen dio euskarari Foru Legeak Sanzen ustez.

Lege horren arabera egiten den hizkuntz eremuen banaketa ere ontzat eman du Nafarroako presidenteak, eta leku batean edo bestean bizi hizkuntza eskubide diferenteak izatea eskubide horiek ez direla hizkuntzenak baizik eta pertsonenak esanez justifikatu du. "Nik ez dut sinesten hizkuntz eskubideetan, eskubideak pertsonenak baitira eta ez hizkuntzenak. Ondorioz, hizkuntzak garatu behar dira pertsonen askatasunetik abiatuta; pertsonen komunikazio tresna aukeratzeko eskubidetik abiatuta".