Nafarroako Gobernuko Osasun Departamentuak gaur aurkeztu du Sexu eta Ugaltze Osasunari buruzko Foru Dekretuaren zirriborroa. Nafarroako Gobernu irekiaren webgunean jarri dute ikusgai, herritarrek eta elkarteek iradokizunak, zuzenketak eta ekarpenak egin ditzaten. Hilabete bateko epea dago horretarako.
Osasunbidean abortatzeko eskubidea onartzen du agiriak. Hala, Foru Dekretua indarrean jartzen den unetik beretik, bi zentrotan egin ahal izanen da haurdunaldiaren etete farmakologikoa, baina eskaintza zentro guztietara hedatu nahi dute gradualki, urtebeteko epean. Abortu «kirurgikoak», berriz, ospitale sare publikoan egin ahal izanen dira, dekretua onartzen den momentutik aitzinera.
Bestalde, laguntza bidezko ugalketa bermatzeaz gainera, zerbitzua sexu bereko bikoteei eta bikotekiderik gabeko emakumeei ere zabalduko die arau berriak, medikuaren baimenik gabe.
Azkenik, transexualei «artatze integrala» eskaintzea da foru dekretuaren helburuetako bat, eta horren barruan sartuko dira terapia hormonalak, bularren edo genitalen kirurgia, eta arreta psikologiko-psikoterapeutikoa, besteak beste.
