Sare plataforma herritarrak bake eta bizikidetzari buruzko jardunaldiak aurkeztu ditu, gaur goizean, Gasteizko Udaletxean. Azaroaren 28tik 30era izango da hitzaldi sorta, Gasteizko Europa Jauregian.
Azaroaren 28an, Sakabanaketa, zigor penalen zenbaketa bikoitza eta salbuespenezko legedia izeneko mahainguruan parte hartuko dute Martin Pallin magistratuak, Iñigo Iruin abokatuak eta Iñaki Lasagabaster administrazio zuzenbideko katedradunak.
Hurrengo egunean, indarkeria mota desberdinetako biktimen testigantzak entzuteko aukera izango da. Sufrimenduari ateak itxi eta itxaropenari leihoa ireki izenburupean ariko dira Unai Gonzalez Azua dispertsioaren biktima, Rosa Rodero ETAren biktima, Carmen Galdeano GALen biktima eta Sara Buesa ETAren biktima.
Jardunaldiei amaiera emango die Gizartea gatazkaren konponbiderako eragile gisa solasaldiak. Mahaiaren bueltan izango dira Juan Jose Ibarretxe lehendakari ohia, Julen Mendoza Errenteriako alkatea eta Anaiz Funosas Bake Bidea elkarteko kidea.
Sareren jardunaldiek Gasteizko Udalaren babesa izango dute. Hiriko udalak "elkarbizitza eta aniztasunerako" proiektuak garatzeko egin duen deialdiari erantzun dio plataforma herritarraren ekinaldiak.
