Hego Euskal Herriko ikasleek ez dute datorren ikasturtean Seneca bekarik jasoko. Espainiako, Galiziako eta Herrialde Katalanetako unibertsitateetan ikasturte bat egiteko laguntza ematen zuen Espainiako Gobernuak, baina datorren urterako deialdia bertan behera uztea erabaki du.
Hezkuntza Ministerioko iturriek BERRIAri baieztatu diote mozketekin zerikusia duela erabakiak; argudiatu dute beka orokorrak lehenetsi behar dituela gobernuak, eta, horrenbestez, mugikortasun programarako dirua erabiliko dutela beka horiek ordaintzeko. Nabarmendu dute gero eta eskari gehiago ari direla izaten bekak, gero eta gehiagok betetzen dituztela horiek jasotzeko baldintzak, eta, beraz, "nonbaitetik" moztu behar dutela.
Ministerioaren arabera, 2013-14ko ikasturteari soilik eragingo dio neurriak oraingoz. Alegia, "atzerapen bat" izango da. Gaineratu dute Erasmus beketan ez duela eraginik izango neurri horrek, eta normal jarraituko duela funtzionatzen.
Hegoaldeko unibertsitateak jada hasi dira PPren gobernuaren erabakiaren berri ematen ikasleei. Hain zuzen ere, hastear zen izena emateko epea; EHU Euskal Herriko Unibertsitatean, adibidez, datorren astelehenean.
