Kristau Eskoletako eta IZEAko ikastetxeetan greba eguna dute gaurkoa; joan den ikasturtean egindakoak kontuan hartuz gero, laugarrena. Sindikatuek jakinarazitako datuen arabera, langileen %65ek egin dute greba. Arabako, Bizkaiko eta Gipuzkoako beharginek Bilboko kaleetan egin dute manifestazioa. Bihar egingo dute bosgarrena. ELA, LAB, Steilas, CCOO eta UGT sindikatuek babestu dute. 120.000 ikasleri eragin dio protestak.
Sindikatuek salatu dute patronalek ez dutela "negoziatzeko borondaterik erakutsi". Jarrera horrekin jarraituz gero, azaroan lau eguneko greba egingo dutela ohartarazi dute. Gogora ekarri dute Kristau Eskoletako eta IZEAko ikastetxeetako 9.000 langileek hamar urte daramatela lan ituna berritu gabe. Horren ondorioz, %10etik gorako erosahalmen galera izan dutela salatu dute. Era berean, gaitzetsi dute pedagogien modernizazioa, digitalizazioa eta berrikuntza "langileen kontura" egin direla, eta horrek "lan kargak handitu" dituela.
