Eusko Legebiltzarrerako hauteskundeetako emaitzek erakusten dute "Euskal Herrian bake prozesua eraikitzeko desioa" dagoela, Sinn Fein Irlandako alderdiak adierazi duenez. Ohar bat argitaratu du Sinn Feinek, eta bertan nabarmendu du EH Bilduk eta EAJk legebiltzarkideen bi heren erdietsi dituztela. "Hautesleek bake prozesua babesten duten alderdien alde botoa emateko duten eskubidea argia da, eta errespetatu egin behar da", gaineratu du.
Halaber, igandeko bozek eta Aieteko Adierazpenak bake prozesua sendotzeko balio dezaketela ohartarazi du Sinn Feinek: "Hautesleek argi babestu dute bide hori".
Espainiako Gobernuari mintzatu zaio Irlandako alderdia. Esan du Madrilek elkarrizketak hasi behar dituela "konpondu gabeko gaietan" lanean hasteko. Horrez gain, "epaiketa politikoak eteteko", Arnaldo Otegi ezker abertzaleko buruzagia libre uzteko eta presoen gaia kudeatzeko eskatu dio. Zehazki, gaixotasun larriak dituzten presoak askatzea premiazkotzat jo du Sinn Feinek.
