Sinn Feinek berriro elkarrizketa politikoa hasteko eskatu dio Espainiako Gobernuari

Alex Maskey Sinn Fein Irlandako parlamentarioa atzo Bilbon izan zen, EAEko Auzitegi Nagusiko epaiketan, "behatzaile independente gisa", eta gaur Arnaldo Otegi ezker abertzaleko kidearekin batera emandako prentsaurrekoan, "Espainiako Gobernuari eta gatazkan inplikaturiko beste eragileei berriro elkarrizketa politikoa" hasteko eskatu die. "Akats handia da elkarrizketa kriminalizatzea", esan du, epaiketa kritikatuz.

Euskal Herriko "gatazkaren konponbide demokratikoaren eta autodeterminazio eskubidearen alde" azaldu da Maskey.

Aipatutako epaiketan akusatuen aulki berean daude Juan Jose Ibarretxe lehendakaria, Patxi Lopez PSE-EEko idazkari nagusia, Rodolfo Ares PSE-EEko Antolakuntza idazkaria, eta Arnaldo Otegi, Pernando Barrena, Rufi Etxeberria, Juan Joxe Petrikorena eta Olatz Dañobeitia ezker abertzaleko kideak, 2006an ETAren su-eten garaian elkarrizketa politikoak egiteagatik.

Otegik berak gaur adierazi du epaiketa hori ez dela juridikoa, baizik eta azkeneko bake prozesuaren eta ezker abertzalearen aurkakoa. "Auzi honek erakusten du Espainiako Estatuaren izaera ez dela demokratikoa".