Herrian Lehen Hezkuntzan jarduteko eskola publikoa behar dutela aldarrikatuz borrokan ari diren Sopuertako familien auzia konponbiderako bidean sartu dela dirudi. Ostiral arratsaldean negoziazioak hasteko hitza eman zien Jaurlaritzak, eta, ondorioz, familiek onartu zuten La Baluga eskola publikoa utzi —Jaurlaritzaren irizpideetatik at aritu dira han, irakasle boluntarioekin, berez ez baitute han Lehen Hezkuntzarik ematen—, eta astelehenean Zallako eskola publikora eramatea. Zazpi ume dira, eta Jaurlaritzak elkarrizketak hasteko abiapuntu oinarrizkotzat jo du ume horien eskolaratze arautua bermatzea.
Bi gurasok eta herriko alkateak gose greba egin dute gatazkaren konponbidea eskatzeko, baina bertan behera utzi dute protesta, Eusko Jaurlaritzako Hezkuntza Sailarekin akordio bat egiteko esperantzan.
Esan dute, orain arteko borroka bertan behera utzi badute ere, adi jarraituko dutela. "Izan ere, orain dela bi urte antzeko prozesu bat izan genuen, eta ez genuen eskola publikoa jartzea lortu", salatu du Karlos Alonsok, familien ordezkarietako batek.
