Euskal Herritik Soriako kartzelara (Espainia) eraman zuen atzo elkartasuna Ernai gazte antolakundeak, Denak Ala Inor Ez dinamikaren barruan. Olentzero bailiran, hainbat pilota bota zituzten kartzela barrura, presoei zuzendutako "maitasun hitzekin", eta presoak etxeratzeko leloa aireratu zuten presondegi gainera, helioz puztutako globoekin.
Espainiako eta Frantziako Gobernuei eskatu zieten "arduraz" jokatu, "konponbideranzko urratsak" egin eta sakabanaketa bukatzeko: "Sakabanaketak eragiten duen sufrimendua amaitu egin behar da ezinbestean". Presoek etxean behar dutela aldarrikatu zuten, gainera: "Gurekin batera, kalean, aske". Horregatik, Bilborako deia egin zieten gazteei: "Mikel Laboaren abestiak dioen bezala, ez gara aske izango bat loturik deino, eta hori lortu artean gogor jarraituko dugu borrokan".
Mobilizazio ugari Bilboko "itsasoaren" atarian
Egun bereziak izaten dira Gabonak euskal preso eta iheslarien senide eta lagunentzat, eta hamaika mobilizazio egin dituzte azken egunetan, elkarretaratze, kantu eta bestelakoen bidez. Horrela, mobilizazioetan bildutakoek dei egin diete herritarrei Tantaz Tantak urtarrilaren 11n Bilbon egingo duen Mobilitsasoan parte hartzeko. Azpeitian, esaterako, ehunka "tanta" elkartu ziren frontoian, kartel urdinak eskuan, denen artean "tanta erraldoi" bat osatzeko. Autobusak ere antolatzen ari dira jada herri gehienetan.
Atzo iluntzean, urteko azken ostirala izanik, milaka herritar irten ziren kalera, herriz herri, preso eta iheslarien eskubideak aldarrikatzeko. Hileroko azken ostiraletan bezala, elkarretaratze ugari egin zituzten Euskal Herrian zehar. Mutrikun, esaterako, 70 lagun elkartu ziren; Elorrion, 147; Abanton, 37; Sondikan, 21; Erandion, 68; Otxandion, 71; Abadiñon, 56; Zeberion, 36; Larrabetzun, 107; Getarian, 72; Zumaian, 65; Zarautzen, 165; Irunen, 160; Hondarribian, 45; Zaldibian, 125; Errenterian, 212; Mendaron, 34; Lasarten, 140; Ikaztegietan, 14; Zizurkilen, 67; Villabonan, 47; Ibarran, 55; Tolosan, 110; Berrobin, 6; Berastegin, 38; Anoeta-Ibarran, 52; Leitzan, 45; Irurtzunen, 80; Lesakan, 36; Berriozarren, 50; Bastidan, 12; eta Zuian, 50.
