Sortu alderdia "birfundatzeko" prozesua hasi dute ezker abertzalean. "Aritzeko eskema berriak asmatzea dagokigu, orain arteko ibilbide eta jakintza kolektiboa oinarri, ideia berriak txertatu eta sortuz", esan dute batzarrean izena emateko zabaldutako oharrean: "Bide horretan, lehen urratsa dugu Sortu berri bat eraikitzea". Hainbat batzar egingo dituzte horretarako; nagusia, nazio mailakoa, uztailaren 2an. Alderdiaren kongresua, berriz, aurrerago egingo dute.
Orain arte Abian eztabaida prozesuan aritu dira, eta maiatzaren 7an egin zuten, Durangon (Bizkaia), prozesu hartako azken batzarra. "Estrategia independentista eraldatzailea" jarri zuten ardatz gisa estrategia berritu horretan, eta egituren antolaketan ere "iraultza" egiteko beharra nabarmendu zuten (behin betiko txostena).
Sortuk 2013ko otsailaren 23an egin zuen eratze batzarra. Aurreko urtean lortu zuen Espainiako Auzitegi Konstituzionalaren legeztapena.
