Sortuk prentsa ohar baten bidez jakinarazi du Donostiako bere "militante ezagun bat" ezker abertzaletik kanporatzeko prozedura abiatu duela, emakumeen kontrako gehiegikeria egitea egotzita. "Orain arte jasotako lekukotza eta datuen arabera, pertsona horrek, bere militante kondizioa aprobetxatuta —eremu eta afera batzuetan erreferentziala zen—, engainua eta manipulazioa erabili ditu emakume gazte biluzien argazkiak lortzeko".
Sortuk "babes osoa" agertu die militante horren biktimei, eta horien esku jarri ditu bere "baliabide guztiak". Kasua gaitzetsi egin du alderdiak. "Sortuk aho betez salatzen ditu gertaera hauek, eta jakinarazten du eraso sexisten aurrean zero tolerantzia izaten jarraituko duela, edozein direla ere erasoen egilea eta erasoaren tamaina".
Joan den maiatzean zioen iaz beste militante bat kanporatu zutela ezker abertzaletik, duela bi urte alabari sexu gehiegikeriak egin zizkiola leporatuta. Militantearen orduko bikotekideak parte eman zuen, eta orain dela bi hilabete auzipetu ere egin zuten.
