Landa etxe gisa erabiltzen den Patxikunborda baserrian sutea izan da goizaldean, Arantzan (Nafarroa). Sua 02:49ak aldera piztu da, eta baserri barruan zegoen lagunak eman du abisua Nafarroako larrialdi zerbitzuetara. Suhiltzaileek 07:00etan lortu dute sua itzaltzea.
Suteak ez du zauritutakorik eragin, baina baserria erabat suntsitu du, hiru solairuak kiskalita geratu baitira. Teilatua hondoratu egin da, eta barneko paretek erortzeko arriskua dute. Polizia sutearen nondik norakoak ikertzen ari da.
Patxikunborda baserria Aiensa auzoan dago, Arantzako erdigunetik 1,5 kilometrora.
Donostiako Cokis tabernan ere sutea
Donostian ere izan da sute bat, Udalak jakinarazi duenez: Cokis Bulebarreko tabernan. Dirudienez, ke-erauzgailuan sortu da, 12:50an. Bi lagun Donostia Ospitalera eraman dituzte: bat kea irensteagatik eta bestea herstura sentitu duelako.
