Bi orenez mintzatu dira justiziaz, bereziki ministroak abian jartzekoak dituen erreformez, baina hitzik ez euskal preso politikoen egoeraz.
Sala mukuru betea zen, Capdeviellek aitzinetik interneten bidez ministroari egin zitezkeen galderak filtraturik pausatzen zizkiola zuzenean. Euskal presoen egorei buruzko galderak eginak izan ziren Internet bidez, baina hauek baztertu ditu Capdeviellek.
Tailerra bukatzerakoan, presaturik abiatzen da ministroa, euskal preso politikoen egoeraz zerbait egitekoa zuenik galdera pausatua izan zaio, baina hark ihardetsi du ezin zuela horrelako baldintzetan erantzun (bizkartzain eta hainbat arduradunez inguraturik, ezin ibiliz ari zela kasik), esertzeko prest agertu da, solastatzeko gogora erakutsiz. Baina bere prentsa arduradunak moztu du solasa, eta Capdeviellek berak ere, "hegazkina" zuela hartzeko eta ezin zela eseri.
Besterik gabe, bizkartzainek beren babes zintura oraindik gehiago tinkatu diote, eta solasa ezin segitua bilakaturik, eskapatu da ministroa .
Nolanahi ere, ministerioko iturriek BERRIAri adierazi diote euskal presoen gaia ez duela baztertzen Taubirak, eta "luze gabe" itzuliko dela Euskal Herrira horren inguruan mintzatzera.
Halere, ikusiz zein "harrera beroa" egin dioten, eta ikusiz Capdevielle eta Taubiraren arteko harremana, "bereziki Capdeviellek hurbiletik segitzen duela erreforma penala", Taubiraren prentsa bulegotik adierazi dute ez dutela saihesten beste bisita bat, baina noiz eta zein baldintzetan ezin dutela zehaztu gehituz.
