Eusko Jaurlaritzako Osasun Sailak birusa atzemateko PCR probak egitera deitu ditu maiatzaren 1etik aitzina Arrasateko (Gipuzkoa) Coliseum gimnasioan izandako herritarrak. Proba egin nahi dutenek aldez aurretik eskatu beharko dute ordua, telefono bidez.
Osakidetzak jakinarazi duenez, baheketa bihar hasiko dute: 10:00etatik 11:00ak arte arituko dira horretan. Zehazki, testak egiteko postuak Debagoieneko ospitaleko kanpo kontsultetarako eraikinean prestatuko dituzte, beheko solairuan. Proben emaitzak SMS bitartez jakinaraziko dituzte.
