Geroa Bai, EH Bildu, Ahal Dugu eta Ezkerrak babestuta egin du aurrera Nafarroako Parlamentuak onartutako mozioa. Kontra bozkatu dute UPNk, PSNk eta PPNk.
Bigarren puntuan, PSNk ere bat egin du mozioarekin; horren arabera, legebiltzarrak "aintzat hartzen ditu Amnistia Internazionalak, Torturaren Prebentziorako Europako Batzordeak eta beste erakunde batzuek argitaratutako txostenak, eta baita Europako Giza Eskubideen Auzitegiak Espainiako Estatuaren aurka emandako ebazpenak ere".
Parlamentuak Madrili eskatu dio Torturaren aurkako Konbentzioaren printzipioei eta Estrasburgoko auzitegiak sortutako doktrinari jarraitzeko, eta horrela, tortura salaketa guztiak "zorrotz" ikertzeko.
Gainera, legebiltzarrak elkartasuna adierazi die "torturak eta tratu txarrak" jasan dituzten pertsona guztiei, eta Nafarroako Gobernuari dei egin dio herritarrek aurkeztutako tortura salaketak iker ditzan. Horien aitortza eta erreparazioa susta ditzala ere galdegin dio Uxue Barkosen gobernuari.
