Hildakoen kopuruak eta positiboen kopuruak biek egin dute gora, gaur jakinarazitako datuen arabera eta aurreko egunekoekin alderatuta. Beste 46 hildako gehitu behar zaizkio heriotzen zerrenda luzeari. Guztira, 1.156 pertsona hil dira martxoaren 4az geroztik, koronabirusarekin gaixotuta. Gaurko datuen arabera, hildako gehienak Gipuzkoan pilatu dira: 25 hildako (bezperan baino 23 gehiago). Araban, bat (sei gutxiago); Bizkaian, 17 (bi gutxiago); eta Nafarroan, hiru (zazpi gutxiago). Positiboen kopuruari dagokionez, 345 kasu berri gehiago zenbatu dituzte, aurreko egunean baino 80 gehiago. Ospitaleratuen kopuruak, berriz, beheraka jarraitzen du, baina erritmo motelean. Guztira, 1.668 pertsona daude ospitaleratuta, aurreko eguna baino 82 gutxiago.Gaurko datuen berri ematean, Eusko Jaurlaritzako eta Nafarroako gobernuko agintariek nabarmendu dute egoera "egonkortu" egin dela. Tragedia egonkortu egin dela esan daiteke, azken 21 egunetan 967 pertsona hil direlako, 46 eguneko.
Koronabirusaren krisiak gogor jo du kulturaren eremuan. Sektorea mugitu egin da. Ehunka kulturgilek greba digitalerako deia egin dute apirilaren 21 eta 22rako. Bi egun osoz ez dute Interneten kultur edukirik partekatuko, "desagertu" egingo dira, ahotsa isilduko dute, entzunak izateko. Gaur bertan, Eusko Jaurlaritzak jakinarazi du sarrerarik gabe geratu diren kulturgintzako langileei oinarrizko soldata bat bermatuko diela. Datorren astean jarriko da martxan diru laguntza eskatzeko bidea. Euskal Editoreen Elkarteko presidente Joxemari Sorsek neurri bereziak eskatu ditu liburugintzaren sektorea pairatzen ari den krisiari aurre egiteko. Gainera, erabakiak "segituan" hartzeko eskatu du Sorsek, bestela berandu izango baita.
Espainiako Hezkuntza ministroa eta autonomia erkidegoetako ordezkariak bildu dira gaur ikasturtea amaitzeko irizpideak finkatzeko. Ikasle guztiek gaindituko dute ikasturtea, "salbuespenezko" kasu batzuetan izan ezik. Ikasturtea ekainean amaituko dute, baina udan errefortzuko ekintzak antolatu ditzakete.
DATUAK: Koronabirusaren azken datuak
MAPA: Koronabirusaren zabalpena herriz herri eta osasun eremuka
ZUZENEKOA: Gertatu ahal kontatutakoa
Agian honek ere merezi du
Umeak gogoan. Umeak kalera atera ahal izateko aldarria gero eta gehiago zabaltzen ari da. Adingabeen konfinamendu egoera arintzea ezinbestekoa dela uste dute askok. Egoera horren harira, 'Akerra ikusi dugu' kantua moldatu eta letra berria jarri dio Maialen Lujanbiok.
Haimaldia. Konfinamendua Saharako errefuxiatuen kanpalekuetara ere iritsi da. Urte asko daramate basamortuan konfinatuta, orain haima barruan. Kanpalekuetako sahararrak egoera nola ari diren bizitzen kontatu du Kristina Berasain kazetariak.
