Trebiñuko gizon bat bahitzeko erabilitako furgoneta oraindik ez du aurkitu Guardia Zibilak

Guardia Zibilak Trebiñun (Araba) izandako bahiketa ikertzen jarraitzen du. Espainiako Gobernuak Burgosen duen ordezkaritzak jakitera eman duenez, 40 urteko gizonezkoa da bahitutakoa. Igande goizean izan zen gertaera. Ustez lau gizonek furgoneta batean sartu zuten biktima. Gizonaren bikotekidea bizilagunengana irten zen laguntza eske, baina ordurako eramana zuten. Guardia Zibila furgonetaren eta han inguruan zebilen beste auto baten bila ari da, baina oraingoz ez dute aurkitu. Bahitu duten gizona, berez, Bizkaikoa da. Baina urte erdia zeraman Trebiñuko Doroño II etxebizitza multzoan, bikotekidearekin eta beste gizonezko batekin alokairuan bizitzen. Lehen ikerketen arabera, gertatutakoa kontu garbiketa izan da. Dena den, lekuko bila jarraitzen dute.