TRENA, BIDETIK IRTENDA

Renfeko aldiriko tren batek istripua izan zuen atzo 15:30 aldera Ugao parean (Bizkaia), bidetik irten baitzen. Une horretan zortzi bidaiari zihoazen tren barruan, eta denak onik atera ziren bertatik. Trena Bilbotik Ugaorako bidea egiten ari zen. Ezbeharraren ondorioz, trenbidea itxita egon zen arratsaldeko parte batean Laudio (Araba) eta Ugao artean. Trenean bidaiatu ezinik geratu zirenentzat autobusak jarri zituzten. Argazkian, langileak, bidetik irtendako trenaren parean.