Mikel Belaskok bere blogean azaldua du Txantrea hitzaren jatorria. Dekalogo bat prestatu zuen, azaltzeko, besteak beste, auzoaren gaurko izena 1774. urtetik aurrera dokumentuta dagoela toki izen gisa. Belaskoren arabera, euskarazko hitzak dira txantre edo xantre. Auzoa sortu zenean, izendapen hori eman zioten.
Orain, Iruñeko udal gobernuak auzoaren izen ofiziala aldatu nahi du, Chantrea-tik Txantrea-ra. UPNk esan du Joseba Asiron alkatearen "beste nagusikeria bat" dela aldaketa, eta "herritarren interesetatik urrun" dagoela.
Eskariak, ordea, badu babesa; Txantreako kolektiboek ofizialki eskatu zioten udalari "berrets dadila Txantrea dela auzoaren izendapen ofizial bakarra, euskaraz zein gaztelaniaz; Nafarroako Gobernuak 1992. urtean ebatzi zuen bezala”. Hamazazpi auzo elkartek egin zuten eskaria.
