Hamar herrialdetako 22 adituk egin dute txostena, eta uste dute "nahikoa froga" badagoela ziurtatzeko txarkuteriak koloneko minbizia eragiten duela. Haragi gorriaren kasuan, ordea, kolon, pankrea eta prostata minbiziak sortzen dituela frogatzeko "ebidentzia mugatua" antzeman dute.
OMEk amiantoarekin eta tabakoarekin alderatu du txarkuteria. "Pertsona batentzat, prozesatutako haragia jateagatik koloneko minbizia garatzeko arriskua urria da, baina arrisku hori hazten doa kontsumitutako haragi kopuruak gora egitearekin batera", azaldu du Kurt Straif doktoreak. Hain zuzen, egunean prozesatutako 50 gramo haragi jateak %18 hazten du minbizia izateko arriskua.
Behi, arkume, zerri eta idi haragiak daude haragi gorriaren artean. Ikerlarien arabera, haragi gorriak minbizia sortzen duela baieztatuz gero, uste dute haragi mota horretan oinarritzen diren dietak munduan urtean 50.000 lagun hiltzearen erantzule direla.
