Ezker abertzaleak antolatuta, igandean egingo diote omenaldia Jose Luis Alvarez Enparantza Txillardegi zenari, eta ezker abertzaleak esan du ekitaldia "abertzaleen batasunaren ispilu" izatea nahiko lukeela, "haren ametsa abertzaleon arteko batasun eta elkarlana zelako".
Donostian izango da omenaldia, Viktoria Eugenia antzokian, 11:30etik aurrera, Agur eta ohore. Euskara, herriaren ondare lelopean. Kultura eta politika arloko lagunek parte hartuko dute, bideoz zein musikaz lagunduta. Musikarien artean Anje Duhalde, Erramun Martikorena, Oreka TX eta Eñaut Elorrieta ariko dira, ezker abertzaleak gaurko aurkezpenean jakinarazi duenez.
Urtarrilaren 14an hil zen Txillardegi politikari, hizkuntzalari eta idazlea, Donostian, etxean, 82 urte zituela.
"Ekarpen erraldoia utzi digu alde askotatik begiratuta. Baina bereziki, bi izan dira haren borroka esparru nagusiak: aberria eta euskara. Txillardegi izan zen aberriaren funtsa hizkuntzan datzala defendituz bidea zabaldu zuena, ondotik hainbat belaunaldirentzat ikur bilakatuz", azaldu du ezker abertzaleak. "Zalantzarik gabe, haren lana funtsezkoa izan da Euskal Herriak egun bere etorkizunari zutik eta euskaraz errepara diezaion".
