Eleak eskubide zibilen aldeko mugimenduak txupinazo herrikoia antolatu du gaur eguerdian Iruñeko udaletxearen plazan, 2010eko txupinazo eguneko istiluak direla-eta Iruñerriko hamahiru gazteren kontra egun gutxi barru egingo den epaiketa salatzeko.
Eleak-ek jakinarazi du egun hartan gazte batzuek ikurrin handi bat atera nahi izan zutela plaza horretan, baina udaltzainak oldartu egin zitzaizkiela. Madrilgo gazte batek zauri larriak izan zituela salatu du mugimenduak, botatako botila batek eragindakoak.
Zazpi hilabete geroago, 16 gazte atxilotu eta akusatu zituzten desordena publikoengatik. Fiskaltzak 2 urte eta hiru hilabeteko zigorra eskatzen du auziperatutako gazte bakoitzarentzat, eta 5 urte eta 3 hilabete ustez botila bota zuenarentzat.
Akusazio partikularrak 11 urteko kartzela zigorra eskatzen du auziperatutako gazte bakoitzarentzat desordena publikoengatik eta agintarien kontrako atentatuagatik, eta 17 urte ustez botila bota zuenarentzat, baita 350.000 euroko kalte-ordaina ere.
Eleak-en iritziz, epaiketa hori "bidegabekeria galanta" da; haren arabera, erasoa jasandako lagunak dira akusatuak. "Plazan gertatutako istiluak UPNren eta bere udaltzainen erantzukizuna dira, arduragabekeriaz sartu baitziren plazara ikurrina kentzeko asmoz", adierazi dute. Dozenaka gazte jo, eta arrisku handiko egoera sortu zutela gaineratu dute.
