10:30ean hasiko da Euskalerria Irratiaren txupinazoko saio berezia, eta ordu horretan hasiko da BERRIAren eta Euskalerria Irratiaren zuzeneko telebista saio berezia ere, Udaletxe plazako irudiekin. Irratiko emankizuna eta txupinazoa zuzenean ikusi ahalko da BERRIAren webgunean, 12:00etan. Jone Amonarriz BERRIAko kazetariak zuzenean kontatuko du Twitterren. Saioak 12:30ak arte iraungo du.
Urtero bezala, BERRIAk luze eta zabal emango du aurtengo sanferminen berri ere. Sare sozialetan #SFK15hashtag-a erabiliko du BERRIAk, sanferminak 2015-en laburdura. Iaz bezala, aurten bederatzi txiolarik bederatzina txio idatziko dituzte BERRIArentzat, bakoitzak egun batean, bakoitzak sanferminetako bere egun bat nolakoa den kontatuz. Txio-kronika BERRIAk sanferminei buruz izango duen webgunean irakurri ahal izango da. Hauek izango dira txiolariak:
Uztailak 6: Asier Azpilikueta kazetari, irakasle eta The Trikiteens taldeko kidea
Uztailak 7: Mikel Idoate pilotaria
Uztailak 8: Maria Solana Geroa Baiko parlamentaria
Uztailak 9: Edurne Arrizibita Karrikiriko kidea
Uztailak 10: Joseba Asiron Iruñeko alkatea
Uztailak 11: Iruñe Astitz kazetaritza ikaslea
Uztailak 12: Lupi Lakasta txiolaria
Uztailak 13: Zuriñe Hidalgo Hesian taldeko abeslaria eta telebista aurkezlea
Uztailak 14: Lexuri Olabarriaga irakasle eta txiolaria
Sanferminetako gune bereziak hainbat atal izango ditu, eta, berritasun modura, aurten Sanferminetako kaiera izango da, non unean-unean gertatzen ari dena irakurri ahal izango den. BERRIAren eguneroko emankizuna hilaren 7tik aurrera hasiko da, entzierroekin, eta, kaieraz gain, eguerdian Euskalerria Irratiaren Sanfermintza saioarekin jarraituko du. Zaldi Zuritik Euskalerria Irratiaren saio hori ikusi ahal izango da BERRIAren webgunean. BERRIAren webgune berezian peñen pankartak eta peña bakoitzaren historia ikusi eta irakurri ahal izango dira.
Txupinazoaz eta entzierroaz gain, arreta berezia jarriko dio BERRIAk zenbait ekitaldi zehatzetan, esate baterako, uztailaren 7ko prozesioan eta uztailaren 8an German Rodriguezi egingo zaion omenaldian —lehen aldiz, Iruñeko alkatea ekitaldian izango da—. Uztailaren 9an peñek Veleta peña gogoratuko dute, horrek 1931n atera zuen pankarta berdina ateraz. Iruñeko Udalak 459 ekitaldi antolatu ditu aurten.
