Udalbiltzak, martxoaren 2an berrantolaketarako egindako bileraren ondoren, proiektu zehatzak abiatzeari ekin dio. Datorren ostegunean aurkeztuko du lehena: Euskal Garapen eta Kohesio Funtsa jarriko du martxan. Nazio eraikuntza praktikara eramatea du helburu, Maitane Nekaran eta Iratxe Lopez de Aberasturi Udalbiltzako kideek azaldu dutenez. "Euskal Herria kohesionatu eta orekatu nahi dugu".
Proiektu zehatzak abiatzeko tresna izango da funtsa, eta dagoeneko eskuetan du hartarako lehen diru saila. 1999an Espainiako Auzitegi Nazionalak Udalbiltzaren aurkako polizia operazioan Zuberoa Garatuz proiektuari kendutako 315.000 euroak. Auzitegiak Udalbiltza absolbitu zuenez, kendu zion dirua itzuli dio instituzioari, eta horixe izango du lanerako abiapuntu.
Ikur korporatiboa
Funtsaren ikur korporatiboa ere aurkeztu du Udalbiltzak, datorren asteko ekitaldiaren berri emateko agerraldian. Lauburuaren buru bat du logotipoak, "txikitik handira" lan egiteko asmoa irudikatzeko.
"Euskal Herria aintzat hartzen dutenei" deia egiteko ere baliatu du prentsaurrekoa; Udalbiltzara batzeko gonbitea egiteko hautetsiei, eta instituzioari laguntzeko gainontzekoei. Atxikimendua eman nahi duten hautetsiek www.udalbiltza.info webgunean eman dezakete, eta instituzioari buruzko informazioa ere bertan topa daiteke.
