UEUren ikastaroak gaurtik Iruñean

UEUk antolatzen dituen udako ikastaldiak azken txanpan sartu berria dira. Ikastaro hauek unibertsitateko kide euskaldunen bilgune izateaz gain, euskal kulturaren erakusleiho txiki bat ere badira. Uztailan zehar era askotako gaiak jorratzen eta eztabaidatzen ari dira udako ikastaroetan. Miarritzek ireki zituen 33.ikastaldiaren ateak, uztailaren 4tik 8ra bitartean. Antzerkilaritza, hizkuntzalaritza, psikologoia, sexologia… izan zituzten hizpide.

Gero, Eibarrek hartu zuen lekukoa, lehen aldiz, uztailaren 11n hasi eta 15 arte. Musika eta ekonomia izan zituzten hizketarako gai, besteak beste.

Eta bukatzeko, gaur hasi eta hilaren 22 bitartean, Iruñea izango da ikastaroen topagunea. Transgeneritatea eta transexualitatearen inguruan arituko dira gaur, eta hurrengo egunetan bertsolaritza, arkitektura, filosofia… izango dituzte mintzagai.