13:30ean ziren iristekoak Espainiako talde ultraeskuindarrak Albiako lorategietara, Bilbora. Haiek iristerako istiluak zeuden inguruetan. 12:00etarako elkarretaratzera deitu dute ultraeskuindarren aurka, baina Albiako lorategiak inguratuta zituen ordurako Ertzaintzak. Kale nagusian elkartu dira orduan, eta 13:00 aldera ahalegindu dira lorategietara joaten.
Orduan hasi dira liskarrak. Hainbat lagunek edukiontziak gurutzatu eta barrikadak jarri dituztela esan du Ertzaintzak, eta oldartu eta hainbat pilotakada bota ditu, jendea sakabanatzeko. Gutxienez hamasei pertsona hartu ditu atxilo, Eusko Jaurlaritzako Herrizaingo Sailak jakinarazi duenez. Horietako batek odoletan zuen ahoa.
Elkarretaratzea egitea lortu dutenak Falangekoak izan dira. Autobusez iritsi dira plazaraino 14:40 aldera, eta han egin dute ekitaldia. Hogei bat ultraeskuindar identifikatu ditu Ertzaintzak; izan ere, istiluak zirela eta, autobusetik jaistea galarazi diete ertzainek, eta horiek zenbait su itzalgailu hustu dituzte polizien aurka. Ekitaldian, alderdi "separatistak" legez kanpo uzteko eskatu dute. Cara al sol kantatu dute amaieran, keinu faxista egiten zuten bitartean.
